GuYon Ala Batak

Tombus do sitta-sitta ni Op.Sabar boi nasida martaon baru di Jakarta… Dimalam 31 i, songon nasomal diula halak batak lumobi par hkbp dipungka nasida do maracara parpunguan ujung taon.
Mansai las do roha ni Ompu Sabar marnida angka pahompunai pistar-pistar mandok hata. Alai mohop do panghilalaanna mambege pangalu-aluan ni parumaenna taringot tu pangalaho ni anakna Bapak ni Si Sabar.. Dung ris mandok hata pahompu ,Anak nang parumaenna, sahat ma tingki tu nasida.
“Dok ma hata sian hita , anggo au tangiang panutup ma annon, ninna Ompu Sabar doli ma tu Inanta na, tarida dang mombun dope mohop ni rohana marnida anak siangkangannai (Bapak ni Si Sabar).
Holan sae Inanta mandok hata,:

“Martangiang ma hita ninna Ompu Sabar ma : ” Ale Debata, mauliate ma ala diloas ho dope hami tolhas martaon baru di bagas ni anak nami di Jakarta on. Mansai las situtu roha nami mamereng angka perkembangan ni pahompu nami, songoni nang diparumaen nami. Alai anggo Bapak ni si Sabar on, tung so huantusi do. Ai dang na muba dope hape sahat tu saonnari. Jadi saulak nai dohononhu tuho Bapak ni Sabar, molo na lomo dope roham ganjang umurhu, uba ma pangalahomi Amang, orui na sai marlapo-lapo i. Ai ho do sijunjung baringin di au, ho do sitiop tongkat estapet na ganjang i..”
Ala lam rarat di bege Ompu Sabar boru, digoit ma Amanta..
Alai lam dipagogo Ompu Sabar ma mandok ” So ho disi Inanta, binsan dison hita.. ”

“Na martangiang do ho Bapa, dang na mandok hata, marhusip ma Ompu Sabar boru pasingothon Amanta i.
Songgot ma Ompu Sabar doli..jala laos leleng sip….
Amen.. ninna Bapak ni Si Sabar ma,ala dibereng ibana vakum suasana. Dung sadar Ompu Sabar doli, lam muruk ma Ibana tu Bapak ni Si Sabar : “Ai boasa ho mandok amen, hape au do namartamiang ?’
“Ba Iba ma daba burjunghu tu Ho Bapa, nang pe sai dimuruhi ho au, tong do hubantu ho mandok Amen..” Hahaha..Mengkel ma Ompu ni Si Sabar doli di muruk na i.. Toe ma Selamat taon baru ma dihita .. Botima.

Sumber Dari : LimRod Matondang